​मराठीतला राखाडी रंग तर इंग्रजीतला ग्रे.. त्याचा उच्चार करतांनाच त्यातला deepness जाणवतो. थोडा नकारात्मक, थोडा उदासीचा, अनिश्चिततेचा तरी संतुलित, वास्तवाचा, परिवर्तनाची ताकत दर्शवणारा रंग !

आजीनं अंगाऱ्याचं बोट कपाळावर लावलं की त्या अंगाऱ्यात, स्वयंपाक घरातील चूल विझली की चुलीतील राखेत, मळभ दाटून आलं की आकाशात आणि मनावर पसरणारा हा रंग, तसा तटस्थ, निःपक्षपाती, परिपक्व, गडद व भावनांकडे झुकणारा ! 

माळरानात निष्पर्ण झालेली झाडे उदास वाटतात, ती याच रंगाची असतात. वयानुरूप येणारी विरक्ती किंवा कमी होत जाणारी आसक्ती दर्शवणारा हा रंग..

Gray refers to cleverness, intelligence, brains, and intellect.. मानवी मेंदूचा रंग आहे हा.

फॅशन,सजावट व ब्रँड ओळख यासाठी हा एक महत्वाचा रंग आहे. पेपर सॉल्ट लुक मधलं देखणेपण म्हणजे याच रंगाची तर जादू आहे.

एकटेपणा व विरह सामावून घेणारा, काही शब्दांमधून डोकावणारा हा रंग..

खाली हाथ शाम आयी है 

खाली हाथ जायेगी 

आज भी न आया कोई

खाली लौट जायेगी,

खाली हाथ शाम आयी है ..

©कविता सहस्रबुद्धे