तशीच आहे राधा

कालिंदीच्या तटावरी ती,
भेट जाहली पहिली
झुळझुळणाऱ्या एक लयीची,
साथ सावळी वेडी

मध्याकाशातील चंद्राचे,
टिपूर चांदणे सजले
आठवणींच्या शिंपल्यातले,
सर मोत्यांचे तुटले

काजळकाळ्या कणाकणांतून,
सूर वेणूचे घुमले
गोकुळातले क्षण अवघे ते,
निळसर होऊन गेले

नेत्रांतून बरसल्या राधेच्या,
मग हळव्या श्रावणधारा
अंतरात त्या भरून उरला,
सूर वेणूचा निळा

त्या क्षणांचा सुगंध अजूनी,
तिथेच आहे मागे
अनिमिष त्या नेत्रांमध्ये,
फक्त  उरला 'कान्हा'..

ओठांवरती साद जूनी ती,
'परतून ये रे सखया'
अजूनही मी तिथेच आहे,
तशीच आहे राधा ....

अजूनही मी तिथेच आहे , तशीच आहे राधा !!!