' धुंद रेशमी धुके '

निळ्या नभी कोर हि, आज का हासली
हात तू हातांत घेतां, रातराणी लाजली …. 

सावळी रात हि, सोबती चांदवा
शब्द होतां मुके, उमलती पाकळ्या …

साथ हि कालची, आज वाटे नवी
ओंजळीत दाटली, स्वप्नं चांदण्यातली…. 

स्पंदने थांबली अन् हरवले भान हे 
सभोवती दाटले, धुंद रेशमी धुके …. 

' शब्द '

भेटतील तुला कधी शब्द माझे,
त्या बकुळ फुलापरी जपलेले
तू नसतां या ओठांवरती,
तुझ्याच करतां सूचलेले …

उमजेल का तू सांग तेव्हा,
मनातले ते तुझ्या तूला
मन पाखरू होऊन क्षणभर,
सांग हरवेल का पून्हां पून्हां …

आज निसटले क्षण सारे ते,
श्वासातं उरली हुरहूर ती
जातां जातां तुजला दिधली,
मी सोबत शब्दांची नवी  !!

' अस्तित्व '

'अस्तित्व' म्हणजे काय ?

खरं सांगू , ' तुझ असणं हेच अस्तित्व ', असं वाटायचं.

पण 'शरीराचं असणं' म्हणजेच असतं का अस्तित्व ? कां ' मनाने जवळ असणं ' महत्वाचं, 
खरचं माहित नाही.…

पण आता वाटतं, नसण्याच्या पलीकडे सुधा, असतच कि एक ' अस्तित्व ' ,
शांत… नि:शब्द … स्तब्ध… अबोल… 

आता फरक इतकाच, ' कालच्या असण्यावरून आजच्या नसण्याचा ' … 

पण म्हणून काही 'तुझं अस्तित्व' नाही बदललं, 

तू गेलीस पण तुझं असणं, इथेच ठेवलसं,  मागे
घराच्या प्रत्येक कोपऱ्यांत, तुळशीत, देवघरांत, अंगणात …

रिकाम वाटलं तरी तुझ्या अशा असण्यानी, घर अगदी भरून गेलंय …
या आठवणी आणि आभासांनी,

पण तरीही वाटतं कधीतरी, हे श्वास अजूनही खोळंबलेत, तुला पाहण्यासाठी…
या कानांना अजूनही आस आहे, तुझ्या आवाजाची…

तुझ्या जाण्याचा पुरावा नाही माझ्याकडे पण तू असण्याचा आहे,
कित्येक क्षणांत, कित्येक जागी, या मनांत , डोळ्यांत , स्वप्नांत ….  

शेवटी आपल्या मानण्यावरच असतं ना हे ' अस्तित्व ' ,
जसं  माझं तुझ्यासाठी अन् तुझं माझ्यासाठी …. 

'  मागे उरले आभास '

मागे उरले आभास, आता कित्येक क्षणांत

सुन्या, रित्या घरट्यात, येई तुझी आठवण 

आता चाहूल ती नाही, ना कांकणांचा नाद 

देवासमोर त्या आता, एक शांत निरांजन

सुन्या उंबऱ्यात तरी, होई रांगोळीचा भास 

तुळशीच्या खाली दिसे, मग गडद काळोख

तुझ्या हाताची ती चव, आतां उरे आठवणींत 

रूप तुझे दिसे कधी, स्वप्नांच्या ओंजळीत

असा कसा हा अबोला, सांग तुझ्यात माझ्यात  

नियतीने का गं केला, असा व्याकूळ प्रहार

जगण्याचा आता कळे,एक वेगळा हा अर्थ 

एका क्षणांत विरला, कसा धागा तो अतूट

तू नसूनही आहे, इथे आमच्या समीप 

डोळे मिटताच दिसे, पहा आई ती सुंदर !!!