क्षितिजावरती रंग निळे हे,
मनास स्मरले काही 
तुला न कळली कधीच का रे,
मनातली हि गाणी

तुझ्याचसाठी सजली अवघी,
बकुळ फुलांनी वाट 
परि न कळली तुला अनामिक,
गंधामधली ओढ 

शुभ्र चांदणे नभी पसरले,
आतुर होई रात 
रजनीगंधा जणू बहरली 
कशी न कळली प्रीत  !!!

                     निळी सावळी रात

मन अलगत हरवत जाते, बहरांत फुलांच्या रानी 

अलवार गीत हे सजले, या धुंद चांदण्या राती 

कधी उनाड होई वारा, या टिपूर निळ्या रातीत 

मग वेड़ लावूनी जाई, तो रातराणीचा गंध 

ती दवांत भिजुनी येई, मग अलगत गोड पहाट 

पारिजात शुभ्र हा नटला, घालून सडा दारांत 

क्षितिजावर हलके येई, मग स्वप्नामधुनी जाग 

मोगऱ्यात हरवून जाई, ती निळी सावळी रात !!!

अवेळीच सांजावल्या या दिशा रे,

             मैफिलीत रुसले तुझे गीत का रे 

मनातले काहूर कसे शांत व्हावे,

             काळजात रुतलेले तुजला कळावे  !!